Plantun de Prouvènço

Pèr coumpara dos planto d'encò nostre

Arabis sagittata & Scrophularia vernalis

Arabis sagittata

Brassicaceae Cruciferae

Nom en français : Arabette sagittée.

Descripcioun :
Aquelo arabeto trachis subretout en Prouvènço preaupenco. A de fueio peludo emé de pichòtis auriho pourtado sus de cambo verdo. Se destrìo subretout emé si péu pèr la maje part simple e pas en estello (fotò). Coumpara emé l'arabeto-peludo qu'a de péu estela.

Usanço :
Li fueio de l'arabeto-sagitado soun manjadisso emai sèmblo pas que i'ague au nostre aquesto usanço. N'en sabèn pas mai sus aquelo planto. Escriéure au site s'avès d'entresigne.

Port : Erbo
Taio : 10 à 80 (100) cm
Fueio : alterno
Tipe bioulougico : Emicriptoufite
Cicle bioulougico : Planto renadivo

Gènre : Arabis
Famiho : Brassicaceae
Famiho classico : Cruciferae

Coulour de la flour : Blanco
Petalo : 4
Ø (o loungour) flour : Pancaro entresigna
Flourido : Printèms

Sòu : Ca
Autour basso e auto : Pancaro entresigna
Aparado : Noun

Liò : Colo - Roucaio - Tepiero seco
Estànci : Mesoumediterran
Couroulougi : Pancaro entresigna
Ref. sc. : Arabis sagittata (Bertol.) DC., 1815

Erbo-dis-escrolo(-dóu-printèms)

Scrophularia vernalis

Scrophulariaceae

Nom en français : Scrofulaire de printemps.

Descripcioun :
L'erbo-dis-escrolo-dóu-printèms se rescontro dins lis esclargido, lis orle de bos e tambèn li prado à rousèu (megafourbié), majamen dins lis Aup Marino. Se recounèis eisadamen qu'èi la souleto à faire de flour jauno. Li fueio, en couor, dounon d'èr à li de l'erbo-de-l'aiet (Allaria petiolata). Sènso èstre sus listo roujo, la planto es aparado en Prouvènço.

Usanço :
Couneissèn pas d'usanço particuliero pèr aquelo planto. Poudèn pensa, que coume lis àutris erbo-dis-escrolo es empouisounanto. Escriéure au site se n'en sabès mai.